شرح حكاية دوري السوبر الأوروبي بكل بساطه ! - وصفات الطبخ العالمية

Breaking

وصفات الطبخ العالمية

مدونه متخصصه في تقديم وصفات الطبخ العالمية والمميزه - المطبخ الشرقي-المطبخ الغربي- المطبخ الاسيوي-بالاضافه لتقديم الاخبارالمتنوعه-والشروحات المميزه .

اعلان

Post Top Ad

Post Top Ad

الخميس، 22 أبريل 2021

شرح حكاية دوري السوبر الأوروبي بكل بساطه !

 لو مش فاهم ايه موضوع دوري السوبر الأوروبي اقرأ المقال دا وهتفهم كل حاجه ان شاء الله .



دوري السوبر الأوروبي.. إيه الحكاية؟ 


صلي على النبي، القصة بترجع لاقتراح قديم بدأ في 2001 تقريبًا بإننا نلم الأندية الكبيرة كلهم ونعملهم بطولة مقفولة عليهم بحيث يلاعبوا بعض والناس تتبسط، الاقتراح اترفض من الفيفا واليويفا بحجة إنه احتكار للمنافسة، بل نسف فكرة المنافسة أصلًا

الاقتراح فضل موجود رغم رفضه، وحصلت مفاوضات من حين لآخر ما بين رؤساء وملاك الأندية واليويفا والفيفا، لحد ما جت الكورونا بخسائرها الاقتصادية في عز ما الإنفاق في اللعبة وصل لحد ضخم جدًا، وهنا الموضوع بقا حتمي للأندية الكبيرة اللي بقت مهددة يا إما بالإفلاس أو التنازل عن وضعها كأندية كبيرة.


طيب هي الأزمة فين؟ أرباح دوري أبطال أوروبا بقت قليلة مقارنة بحجم إنفاق الأندية الكبيرة، خصوصًا وإن 60% منه بيروح لليويفا و40% بس للأندية، وهنا قالوا لا احنا لازم نقف وقفة، ماهو مش نبقى احنا مصدر دخل اللعبة والفلوس دي كلها بتتدفع عشاننا وعشان لعيبتنا وفي الآخر ناخد فتافيت، وقاموا مزعقين وشوحوا بإيدهم كده

فلورنتينو بيريز وشلة رؤساء الأندية الكبيرة لموا بعض ع القهوة واتفقوا يفتحوا ستارت آب، حاجة كدة زي التسويق الشبكي، شجرة وكل واحد بيجيب 2 تحتيه وبتاع.

ازاي بقا؟ قالك احنا نعمل رابطة، والرابطة دي بشكل مستقل تبدأ تشتغل بعيدًا عن سيطرة أي اتحاد على إنشاء البطولة بتواجد 20 فريق، 15 منهم ثابتين أعضاء مؤسسين، و5 متغيرين لم يتم الاتفاق على شروط وكيفية اختيارهم لحد دلوقتي.

الأعضاء المؤسسين دول هيتواجدوا بشكل دائم كل سنة، وهيكونوا هما مجلس إدارة البطولة أو صحاب البطولة بالمعنى الحرفي للكلمة، مفيش أي إشراف عليهم لإن هما الإشراف نفسه.

خلال الفترة الأخيرة، ومع الاجتماعات المكثقة قرروا ياخدوا الخطوة ويعلنوا إنشاء البطولة رسميا ولتذهب الفيفا واليويفا للجحـيم، وأعلنوا بداية البطولة في بيان رسمي صدر النهاردة.

العالم اتقلب، والاتحاد الأوروبي أعلن عقوبات كبيرة لأي نادي هيشارك في البطولة دي هتوصل لاستبعاد وشطب وغرامات بالمليارات وما إلى آخره، والفيفا أيد موقفهم، والاتحادات المحلية كذلك في إسبانيا وإنجلترا وألمانيا وإيطاليا.

السؤال بقا، الاتحادات دي بتعمل كدة ليه؟ ببساطة لإن لما دوري السوبر الأوروبي دا يتعمل هيبقى هو صاحب عامل الجذب الأول بل هو كرة القدم كلها بالنسبة للجمهور، وبالتالي لا البريميرليج هيبقى بنفس الجاذبية ولا دوري الأبطال ولا اليورو ولا كاس العالم ولا أي بطولة.

وبالتالي هتضرب عقود البث التلفزيوني والرعاية وخلافه في مقتل، والاتحادات مش هتلاقي مصادر دخل، ودا هيخلي البطولات القائمة بالفعل بلا قيمة دا لو فضلت موجودة أصلا والأندية الكبيرة منسحبتش منها، قصاد الغول اللي اسمه دوري السوبر الأوروبي دا.

طب هو ليه الفجوة دي هتحصل أصلًا، لإن حجم الإنفاق في البطولة هيبقى أضخم من الضخامة، البطولة هيتم تمويلها بـ 6 مليار دولار من بنك "مورجان الأمريكي" وهيحصل كل فريق على 350 مليون يورو سنويًا نظير مشاركته بس، والبطل هيقفش له بتاع مليار يورو.

علمًا بإن أرباح الفوز بكل البطولات الحالية والتتويج بالسداسية متوصلش لـ 100 مليون يورو في السنة تقريبًا، اللي انت كنادي تقدر تعمل 4 أضعافهم حرفيا بمجرد مشاركتك بس في دوري السوبر حتى لو خسرت كل ماتشاتك!

ونتيجة دا، الأندية والجماهير والعالم والفلوس كلها هتتوجه ناحية البطولة اللي بتجيب الفلوس، والباقي هيترمي.

المشكلة الأكبر بقا بالنسبة للاتحادات إن دوري السوبر الأوروبي غير خاضع لأي جهة بل خاضع لمؤسسيه، ودا هيخلي الكورة تتحول للعبة مملوكة حرفيًا ببطولاتها وقوانينها لرجال الأعمال والبنوك، بلا أي سيطرة لأي اتحاد وأي قانون ولا قيمة لوجودهم أصلا

وممكن أي شيء يتيغير في أي وقت لمجرد إن الممولين والناس اللي معاها فلوس شايفة كدة، وبناء عليه اللعبة هتدار بواسطة أشخاص وهينتهي عصر المؤسسات.

حتى الآن دي التطورات ودي اللعبة، أندية دوري السوبر الأوروبي ضربت بكل الكلام والتهديدات والرفض عرض الحائط وأعلنت بداية البطولة رسميًا في بيان النهاردة، ومن المنتظر أن الاتحادات كلها تبتدي تجتمع عشان يوصلوا لحل وسط.

مين صباعه تحت ضرس مين؟ الأندية طبعًا اللي حاطة صباع الكل تحت ضرسها، الأندية هي اللي ليها الجماهير ومعاها اللعيبة اللي بتجيب الفلوس وهي اللي هتقدر توجه الدفة ناحية ما تحب، والفيفا واليويفا والاتحادات المحلية هتكون مجبرة تسمع الكلام لإن اللي معاه الفلوس هو اللي في إيده القوة.

دا اللي تم التوصل إليه حتى الآن، ودا اختصار الموضوع اللي مش بسيط أبدًا، بل هو أكبر تحول في تاريخ كرة القدم على الإطلاق وبداية لتحوّل كامل للعبة وشكل جديد قد لا يشبه الحالي في أي حاجة.

طولت عليكوا معلش 😅

يلا كل سنه وانتوا طيبين ♥

ليست هناك تعليقات:

إرسال تعليق

Post Top Ad